Рынак беларускай нерухомасці становіцца нерэальна жорсткім. Вось такую аб'яўку нядаўна ўбачыў на сваім пад'ездзе: мала таго, што людзі, якія шукаюць кватэру, абяцаюць плаціць у любой валюце, дык яны яшчэ і фотаздымак сваёй сям'і размясцілі на аб'яве! У прынцыпе, я магу зразумець гэтых людзей, але, па-мойму, гэта ўжо ненармальна - так мы хутка дойдзем да таго, што будзем на аб'яўках друкаваць свае аўтабіяграфіі, крэдытныя гісторыі з банкаў, выпіскі з бухгалтэрыі аб даходах, характарыстыкі з месца працы і біяграфіі родных...
Наогул, сфера арэнды нерухомасці ў Менску (а мо і ў краіне ў цэлым) вельмі, скажам так, дзіўная. Напрыклад, калі ў 2011 годзе былі праблемы з валютай, толькі рэдкія ўладальнікі нерухомасці ішлі насустрач сваім кватарантам і бралі аплату ў беларускіх рублях. Астатнія і слухаць нічога не хацелі: нясі баксы і ўсё. І гэта я ўжо не буду казаць пра цэны - як аднапакаёўка каштавала да дэвальвацыі 180 баксаў, так каштуе і сёння. Некаторыя гаспадары па некалькі месяцаў не маглі знайсці сабе наймальнікаў у кватэру, але цану пры гэтым упарта не зніжалі...
Цікава, што вельмі добры шанец умяшацца ў рынак арэнды кватэр магла дзяржава са сваімі так званымі арэнднымі дамамі і кватэрамі - пры вялікай колькасці такога жылля ад Мінгарвыканкама можна было вельмі добра збіць цэны на рынку. Але ж не, дзяржава вырашыла падзарабіць і выставіла такія кошты на свае кватэры, што яны ў некаторых выпадках сталі даражэйшыя за аналагічныя хаты ад прыватных асоб. Прынамсі, прагледзеўшы ўсе варыянты на сайтах адміністрацый раёнаў Менска я так і не знайшоў для сябе добрай кватэры па прымальным кошце.
Ну і напрыканцы яшчэ адна гісторыя пра нерухомасць. Калісьці мая жонка шукала сабе кватэру. Тэлефануе ёй нейкая жанчына і прапануе 2-х пакаёвую кватэру ці то за 300, ці то за 350 долараў ледзьве не з відам на МКАД. Воля кажа: "Не жанчынка, не патрэбна нам вашая кватэрка. Дорага". На што тая проста абурылася: "Як дорага? Мне ў агенцтве сказалі, што мая кватэра каштуе менавіта столькі!!!" Ну што тут скажаш - шукай далей сабе дурняў, у агенцтве ж абы-чаго не параяць...
